Тыбылты Инга: ирон ӕвзаг кӕд популярон нӕу, уӕддӕр ын ис рӕсугъд фидӕн
Фӕсивӕды сӕдӕгай минӕвӕрттӕ ныридӕгӕн ӕвзарынц сӕ дарддӕры цардвӕндаг – абитуриентты хъӕуы дӕсныйад равзарын. Хъыгагӕн, ирон филологийы факультет фӕстаг рӕстӕджы нал у популярон. Æвзаджы уавӕр, республикӕйы царды хъӕугӕ ӕмӕ ахадгӕ дӕсныйӕдтыл дзуры Sputnik ирон филологийы декан, доцент, ӕвзагзонӕг Тыбылты Инга.
— Ирон филологийы деканат ацы аз цы факультеттӕм хоны абитуриентты?
— Ирон филологийы деканаты абоны бон ис фондз факультеты, уыдонӕй ӕртӕ боны хайады, аннӕ дыууӕ та фӕсаууонмӕ. Хъыгагӕн, ирон-персайнаг факультет ӕхгӕд ӕрцыд, специалисттӕ кӕй нӕ фаг кодта, уый аххосагӕй.
Боны хайады сахуыр кӕнын кӕй фӕнды, уыдонӕн сӕ бон у равзарын ирон — уырыссаг, тӕлмац, райдайӕн ахуырад ӕмӕ педагогикӕйы факультетты ӕхсӕн. Фӕсаууонмӕ та бындуронӕй сахуыр кӕнӕн ис ирон ӕвзаг ӕмӕ литературӕйы ӕмӕ скъолайы агъоммӕ педагогикӕ ӕмӕ психологийы дӕсныйадыл.
Тӕлмацы факультеты ацы аз, хъыгагӕн, нӕ бакодтам, ис дзы ӕрмӕстдӕр дыууӕ курсы. Фӕлӕ йӕ куы бакодтам, уӕд ӕй адӕм нӕ бамбӕрстой ӕмӕ нӕм ӕрбацыд ӕдзӕттӕ фӕсивӕд.
— Дӕ хъуыдымӕ гӕсгӕ, цӕмӕн хъуамӕ равзарой фидӕны студенттӕ иннӕ факультетты ӕхсӕн ирон филологийы?
— Хъыгагӕн, нӕ деканаты факультеттӕм бирӕ фӕсивӕд ахуырмӕ нӕ цӕуы. Фӕлӕ нӕм цы дӕсныйӕдтыл ахуыр кӕныц, уыдон иууылдӕр сты нӕ абоны царды ахсджиаг. Хуссар Ирыстоны ис дыууӕ паддзахадон ӕвзаг — ирон ӕмӕ уырыссаг. Ацы дыууӕ ӕвзаг бындуронӕй сахуыр кӕныны фадат ис махмӕ цалдӕр факультеты. Нӕ рауагъдонтӕ фидӕны ӕгустӕй нӕ баззайдзысты. Фадат сын уыдзӕн кусын куыд ахуыргӕнджытӕй, тӕлмацгӕнджытӕй, афтӕ ма зонад-иртасӕн институты ӕмӕ журналистикӕйы фадыджы.
— Цы факультеттӕ ма феххуыс уаиккой ирон ӕвзаг сахуыр кӕнынӕн ӕмӕ йӕ райрӕзтӕн?
— Ирон ӕвзагмӕ бындуронӕй ӕркӕсын, йӕ ратӕдзӕнтӕ ӕмӕ авналӕнтӕ сахуыр кӕнынӕн ӕнӕмӕнг хъӕуы зонын персайнаг ӕвзаг. Фӕлӕ нын спецалисттӕ кӕй нӕ фаг кодта, уый аххосагӕн факультет ӕхӕгӕд ӕрцыд.
Ныридӕгӕн ахуыргонд Битарты Зоя архайы ацы фарстыл, ныхас кодта президентимӕ дӕр. Ныфс нын дӕттынц, дыууӕ — ӕртӕ студенты хицауады хӕрдзтӕй кӕй арвитдзысты Иранмӕ персайнаг ӕвзаг бындуронӕй сахуыр кӕныны тыххӕй.
Ацы фарстыл ма тыхсы Дзотты Тамерлан дӕр. Уый ӕрӕджы райста фыстӕг ирайнӕгтӕй, уыдон ӕй сӕ бӕстӕмӕ хоныц ӕртӕ студентимӕ иумӕ ӕнӕаргъӕй. Уыдон уым иу мӕйӕ къаддӕр нӕ уыдзысты. Цӕмӕй персайнаг ӕвзаг сахуыр кӕнай, уый тыххӕй хъӕуы се ‘хсӕн ацӕрын.
Нӕ фӕнды ма ис деканаты аккагдӕр студенты Санкт-Петербургмӕ арвитын скӕсӕйнаг ӕвзӕгты факультетмӕ. Уый та фадат ратдзӕн, цӕмӕй нӕм фӕзына нӕхи бынӕттон специалисттӕ дӕр ӕмӕ уӕд персайнаг факультет бакӕнынӕн дӕр ницы хъыгдардзӕн. Ацы факультет ӕнӕмӕнгхъӕуӕг у ирон ӕвзагы рӕзтӕн.
2008 азы хӕсты агъоммӕ фӕнд кодтам Санкт-Петербурджы Скӕсӕйнаг ӕвзӕгты институты филиал бакӕнын Цхинвалы, фӕлӕ нӕ хӕст бахъыгдардта.
Ныр нын кӕд бантыса, уӕд иу ацы факультеты иууыл хуыздӕр студенттӕ сӕ ахуыр адарддӕр кӕниккой Санкт-Петербурджы. Уый къухы кӕд бафта, уӕд нӕ зонад дыууӕ къахдзӕф размӕ сараздзӕн.
— Ирон ӕвзагы уавӕр куыд у абон ӕмӕ йын йӕ размӕцыдӕн цы хъӕуы саразын?
— Ирон ӕвзаг кӕд популярон нӕу, уӕддӕр ын ис рӕсугъд фидӕн. Стӕй ма дзы ис ӕнӕкӕрон бирӕ сахуыркӕнинаг ӕрмӕг дӕр. Уыдон иууылдӕр сты иртасинаг.
Дӕнцӕгӕн сисӕм Битарты Зояйы, Дзиццойты Юрийы. Уыдон фесты ацы ахуыр ӕмӕ цӕмӕй сты фӕсмойнаг? Ахадгӕ у сӕ куыст зонады фадыджы дӕр ӕмӕ сӕ ӕхсӕнадон архайд дӕр.
Бӕргӕ арф куы ныхъхъуыды кӕниккой нӕ фӕсивӕд ӕмӕ сын сомбон чи бабӕзза, ахӕм дӕсынайад куы равзариккой.
Хорз уаит, Ахуырады министрад дӕр ацы фарстмӕ хъусдард куы аздахит ӕмӕ Ирыстоны фӕсивӕды ирддӕр минӕвӕрттӕ фӕсарӕнтӕм куы нал цӕуиккой ахуыр кӕнынмӕ лимитты руаджы.